Kabanata 21
“Kuya Rodney!” nagmamadali si Lacey sa pagbaba ng hagdan habang tinatawag ang bodyguard driver niya.
“Dahan-dahan, anak!” anang Mama niya sa kanya dahil halos tumatakbo na siya.
“Si kuya Rodney, Ma?” tanong niya sa ina.
“Susko, nilalagnat. Naroon sa kwarto niya at dadalhan ko nga ng pagkain saka gamot. Trangkaso siguro iyon. Sabi ko nga magpaduktor. Ayaw daw mabawasan ang sweldo na ipadadala sa mga magulang sa probinsya.”
“Ipagamot na natin, Ma. Kawawa naman.”
“Oo nga. Mamaya pasasamahan ko kay Sylvia. At saka anak, narito na pala ang bagong kasambahay, si Frances.”
Tumingin siya sa bukana ng kusina nang makita niya ang isang bagong mukha at sa pagtataka niya ay hindi iyon kwarenta anyos. Mukha lang iyong halos kasing edad niya. Ang sabi niya ay ayaw niya sa bata.
