BLESSY
“ANONG nangyari, babe? Nakaharap mo ba ang taong nagtulak kay Catriona? Ano raw ang dahilan at bakit niya ginawa iyon?” sunod-sunod na tanong ko agad kay Dux nang salubungin ko siya sa garahe pagkarating niya galing sa school.
Buong sandali nang umalis siya ay hindi ako mapakali dahil sa dalawang rason: sa paghaharap nila ng nanakit sa anak ko at sa muling pagkikita nila ni Teacher Maureen.
Though, itinanggi niya naman sa akin kagabi na hindi raw ang guro na iyon ang nakakita, at nagsabi sa kaniya. Isang magulang din daw na naghihintay sa anak. Gayon man ay hindi pa rin ako lubos na naniniwala. I know he’s hiding something from me as well. I can feel it.
At nalulungkot ako. Dahil buong buhay ko simula nang magkakilala kami ni Dux ay ngayon ko lang siya pinagdudahan nang ganito.
