KINABUKASAN ay maagang gumising sina Karzon at Tanya. Gusto kasi ni Tanya na manood silang mag-asawa ng sunrise sa may tabing dagat. Isa pa, maganda iyon para sa kaniyang katawan.
Habang naghihintay sa paglabas ng haring araw ay nakaakbay pa sa kaniya si Karzon habang marahan silang naglalakad sa may tabing-dagat. Ang mumunting alon ay humahampas sa mga paa nila ni Karzon. May kalamigan iyon at kay sarap sa pakiramdam. Sa tigkabilang kamay nila ni Karzon ay hawak nila ang kani-kaniyang sapin sa paa.
May kalamigan din ang hampas ng hangin ng mga sandaling iyon. Balot naman siya ng suot niyang bathrobe kaya kahit paano ay naiibsan ang panlalamig na kaniyang nararamdaman. Idagdag pa na nakadikit siya sa katawan ng kaniyang asawa.
“Ang sarap dito,” aniya kay Karzon bago muling inilibot ang
