"OKAY ba sa inyo ang date na napag-usapan, hijo, hija?" anang Papa ni Dimmitry sa kanilang dalawa ng binata. Tapos na silang maghapunan noon at nagkakape na lang. Naroon pa rin ang lahat maliban kay Dominique na pinangatawanan talagang hindi na bumalik sa event center. Kanina pa ito hinahanap ng mga magulang pero nagwalang kibo na lamang siya. Hindi na niya sinabing nasa tabing-dagat ito at nagmumukmok. Baka masira pa niya ang gabi ng lahat. Inakbayan siya ni Dimmitry at tiningnan ng buong pagsuyo.
"Kung ako ang tatanungin, Papa, gusto ko nga sana na bukas ay ikasal na kami kaagad nitong si Althea. Hindi na ho ako makapaghintay na makasama siya," anito na hindi kumukurap habang nakatitig pa rin sa kanya. "But I know that it takes time for the preparations kaya okay na ho sa akin ang date
