PAGKAGALING sa trabaho ay kaagad na dumiretso sa kanilang bahay si Piper. Labis-labis ang kaniyang pag-iingat upang hindi sila magtapo ni Liam. Kahit gaano pa kalaki at kalawak ang Hacienda Villarama ay hindi malabong magtagpo ang kani-kanilang landas. Pagkauwi sa bahay ay kaagad niyang isinara ang pintuan. Pabagsak siyang naupo sa upuan. Niyakap ang mga binti at tumingin sa sahig. “Ang sama talaga ng ugali niya, balang araw magsisisi siya sa mga ginagawa niya. Sana’y makahanap siya ng katapat!”
Dalawang araw na ang lumipas simula noon ngunit hanggang ngayon ay galit na galit pa rin siya sa lalaki. Hindi niya makakalimutan kung gaano siya nito minaliit. Idagdag pa ang mga natamo niyang sugat ng araw na iyon. Isinisisi niya rin ito sa lalaki. Maigi na nga lamang at mahilig siyang magsuot
