RITHWELL PRYCE ARANDIA
__
Dahan-dahan akong lumapit sa pintuan ng simbahan. Mula roon naririnig ko ang mga nag-e-ensayo sa pagkanta. Kusang kumilos ang mga mata ko para hanapin ang taong pinunta ko roon.
Agad nabuo ang bahagyang ngiti sa mga labi ko nang makita ko si Nigel. Mukhang seryoso siya at mukhang gusto niya kung ano ang ginagawa niya.
Dumiretso ako papasok sa loob na nagtungo sa isa sa mga upuan doon nang matapos sila. Nagpaalam siya sa mga kasamahan hanggang sa mapatingin siya sa direksyon ko.
Natigil agad ito at tila na-estatwa na sa kinatatayuan. Alam kong hindi niya inaasahan na pupunta ako roon.
Nakaalis na halos lahat ng kasamahan niya nang humakbang siya palapit sa direksyon ko. He sat beside me.
Matagal kaming kinain ng katahimikan habang nakatingin lang sa altar.
