“SEE? Magaling na ako,” pagmamayabang pa ni Aniah sa kaniyang tatlong kapatid na sumundo sa kaniya sa Salcedo Medical Center.
“Tinurukan ba ‘yan ni Doc Ashton ng booster?” bulong pa ni Dos kay Uno.
Nagkibit-balikat naman si Uno. “Ewan.”
“Sabi ni Kaizen, may kinain daw na lugaw si Aniah,” ani Tres. “Kakaibang klase nga raw.”
“Saan daw galing?” usisa naman ni Uno.
“Tinanong ko ‘yong bantay ni Aniah, may nag-deliver daw rito. Order ni Aniah,” sagot naman ni Tres.
“Nag-order siya online? Aniah,” tawag pa ni Dos sa kapatid na abala sa pagsusuklay ng buhok habang nakaupo sa isang sofa.
“Hmm?”
“Saan ka um-order ng lugaw?”
Sandaling natigilan si Aniah dahil sa tanong na iyon ng kaniyang Kuya Dos. Sina Uno at Tres naman ay mataman siyang pinakatitigan. Naghihintay sa magiging sagot niya.
