BINISTAHAN ko ang silid na kinaroroonan ko. Nasa kabibiling bahay ako ni Lucas dahil doon niya ako idiniretso matapos akong ma-discharge ng hapon na iyon. Nasa ibaba naman si Lucas at kausap ang mga pulis na humahawak ng kaso namin ni Mr. Samaniego. Ayon sa mga ito ay isang pamilyadong tao ang nakaaksidente sa amin na hindi naman daw ginustong banggain kami kundi lang nawalan ng preno ang minamanehong sasakyan. Umaangkat lang daw ang mama ng mga gulay mula sa bayan ng Nagcarlan at sa Hacienda Valencia madalas na dumadaan. Saktong doon naman kami napatigil ni Mr. Samaniego habang nagtatalo ng hapong iyon at kung tutuusin ay may kasalanan din kami dahil hindi namin agad narinig ang mga busina at hindi rin namin agad nakita ang parating na truck. Dinig ko ay humihingi ng areglo ang pamilya ng
