ALEX
DAHIL bahagya pang magulo ang aking isip ay nagpasya akong dito lang din sa Pilipinas manatili. Naisip ko kasing mahirap para sa akin kung sakaling sa ibang bansa ko ipagpatuloy ang aking pagbubuntis. Bukod sa nag-iisa ako ay hindi rin madali ang mamuhay sa banyagang bansa. Wala rin naman akong balak na magtago habangbuhay. Ang nais ko lamang ay pansamantalang makalayo sa gulo at hayaang mapanatag ang aking isip bago ako tuluyang gumawa ng desisyong magpapabago sa buhay naming lahat.
Malamang ay hindi pa nakakabalik ang aking mga magulang mula sa kanilang bakasyon kaya't may ilang o linggo pa akong nalalabi bago magtanong ang mga ito tungkol sa aking kinaroroonan. Tumawag na rin ako sa aking sekretarya upang magbilin na ibigay na muna ang lahat ng importanteng transaksyon kay Klaus.
