DAY 15.
Habang kumakain ng agahan sina Bornok ay nakakaramdam nga siya ng pagka-ilang sa babaeng nasa tapat niya nang sandaling iyon. Nasa tapat kasi niya si Karmina na katabi naman ang anak nito na kasalukuyan nitong sinusubuan. Iniisip kasi niyang ngingitian siya nito kanina nang magkasalubong silang dalawa, kaso, parang wala pa rin daw pinagbago ito. Parang ilang din ito sa kanya at inisip na nga lang niyang mas mabuti na nga lang daw na ganito.
“Sana lang ay masaya ka na ngayon,” sabi ni Bornok sa sarili matapos uminom ng tubig.
“Aalis kami ni Lolo Terio, mamimili lang kami sa sentro ng supply ng pagkain natin dito,” sabi bigla ni Mira na kasalukuyan na ring patapos sa pagkain.
“Ate, maaari ba akong sumama?” tanong naman ni Trixie na kakatapos lang din uminom ng tubig.
