Nakaramdam ako ng lamig sa bandang braso ko. Nagdilat ako ng mga mata. Bumungad sa akin ang isang hindi pamilyar na kuwarto. Napabalikwas ako ng bangon. Nakakumot ng comforter ang kalahati ng katawan ko.
Pinakiramdaman ko ang sarili ko. Mukhang wala namang nangyari sa akin. Wala akong nararamdamang kakaiba. Suot ko pa rin naman ang mga damit na suot ko kanina sa parada.
"Nasaan ako?"
Sinuyod ko ng tingin ang kabuuan ng kuwarto. Bakit ako naririto? Pilit kong inalala kung bakit ako naririto. Bigla kong naalala ang nangyaring pagdukot sa aming mag-ina. Si Marthina! Nasaan ang anak ko?
Hindi rin nakatali ang mga kamay at paa ko. Para lang akong bisita na natutulog ngayon dito sa isang magandang kuwarto. Ano ba kasi ang kailangan nung mga dumukot na iyon sa akin? May kinalaman na naman b
