His Perfect Mistake

Ikatlong Kabanata

"My gosh, Damon, what happened to you?" bulalas ni Natalia nang makita ang nobyo sa hindi kaiga-igayang itsura. Kapapasok lang nito sa sasakyan at mukhang nanlalagkit dahil sa kung anong bagay na kumapit sa buhok at damit na suot nito.

"Someone stupid jostled me with this cheap, sticky drink," inis na sagot ni Damon matapos makaupo sa driver seat at isuot ang kaniyang seatbelt.

"Tsk! Sinabi ko naman kasi sa'yo na huwag na tayong pumunta sa lugar na ito. Hindi mo na dapat sinadya pa ang pasyente mo, dapat inutos mo na lang sa iba," may halong paninisi na sabi ni Natalia sa kaniyang nobyo habang pinupunasan ng tissue ang mamahaling polo nito. Nandidiring kinuha pa nito ang nakitang gulaman sa ulo ng binatang doktor.

"She's not just a patient, babe, she's my Yaya Linda. She took care of me when I was young and up to now, dapat lang na gantihan ko ang kabutihan niya sa akin lalo na ngayong may edad na siya at may sakit," pangangatwiran niya.

"Hmp! Binabayaran siya para alagaan ka. Hindi niya ginawa sa iyo iyon out of concern, iyon ang trahaho niya. She's just after the money, okay?"

"Stop saying that! Hindi ganu'n si Yaya Linda. Inalagaan niya ako ng may pagmamahal, itinuring niya akong parang tunay na anak," apela ni Damon.

Sa lahat ng ayaw ni Damon ay iyong pinagsasabihan ng masama ang kaniyang Yaya Linda na itinuring na rin niyang pangalawang ina.

Umirap si Natalia. "Hmp! Tama na siguro na sagutin mo ang medical expenses niya, pero tama ba namang pati sa date natin ay isisingit mo pa rin ang pagdalaw diyan sa yaya mo? Tingnan mo tuloy ang nangyari sa'yo, paano pa tayo makakapag-lunch niyan kung ganiyan na ang itsura mo?" Hindi maipinta ang mukha ni Natalia sa labis na inis. Hindi naman siya mismo kay Damon naiinis kung hindi sa yaya nito na umaagaw ng oras ng nobyo na para sana sa kaniya.

Huminga ng malalim si Damon, pilit niyang pinahinahon ang sarili. Kilala niya ang nobya, hindi ito titigil kaya siya na ang magbaba ng kaniyang pride para matapos na ang pagtatalo na iyon.

"I'm sorry, babe! Huwag na tayong magtalo tungkol dito. Huwag nating sirain ang araw na ito. Bumalik na lang muna tayo sa penthouse ko, I will take a shower and change clothes. After that I'm all yours." Ang tono ng boses niya ay mahinahon na may kasamang lambing.