HINDI maka-get over si Stella sa mga narinig mula kay Fabio. Saktong nakapaghain na ng hapunan kaya dumiretso na sila ni Glenn sa hapag. Si Fabio naman ang bumukod sa kanila. Sa lanai ito kumain.
“Noname, puwede pa rin akong matutong mag-drive, ‘di ba? Tinuruan mo nga ako,” mamaya ay sabi ni Glenn.
“Oo naman, pero basic lang muna. At saka hindi ka naman magda-drive sa mismong highway,” aniya.
“Bakit sabi ni Fabio huwag ko raw pilitin na mag-drive.”
“Nag-aalala kasi siya baka mapahamak ka lang lalo’t may trauma ka na dati pa.”
“Paanong trauma?”
“Like the car accident.”
“Hindi ko alam ‘yon.” Sumubo ito ng pagkain.
“Baka talagang matagal nang tumigil sa pag-drive si Glenn,” apela ni Carlo.
“Pero mabilis naman siyang matuto. Kung walang magti-trigger sa trauma, hindi ito susumpong.”
