Tubong taga-Mindanao si Imari Villegas at isang Mechanical Engineer. Lumipat lamang silang mag-asawa sa Maynila dahil doon na nadestino ang asawa nito bilang Military Intel. Kabilang ang asawa nitong si Capt. Augustus Villegas sa mga na-promote na Military Intel dahil sa pagbibigay ng report sa mga kasamahang sundalong lumusob sa North Cotabato upang masupil ang kalakaran ng mga ilegal na gawain ng mga New People’s Army.
Sa kabila ng magandang career ni Imari at sa maalwan nilang buhay, hindi pa rin ito sapat sa kaniyang asawang si Augustus. Naging maayos naman ang unang taon ng kanilang pagsasama ngunit nagbago ang asawa nito dahil sa hindi niya malamang dahilan. Naging mainitin na rin ang ulo nito at madalas ay pinagmumulan nila ng pagtatalo. Minsan din ay napagbubuhatan siya ng kamay ng kaniyang asawa.
Isa sa mga dahilan ng kanilang pagtatalo ay hindi niya ito mabigyan ng anak. May problema siya sa kaniyang ovary at ilang doctor na rin ang sumuri sa kaniya ngunit wala rin magandang resulta. Itinago niya sa loob ng limang taon nilang pagsasama ang pighati at pagmamaltrato nito para lang isalba ang relasyon at pangalan ng bawat isa. Tiniis niya ang lahat para lang kay Augustus at nagpaka-martir. Nagbanta rin itong manganganib ang buhay niya kapag nagsumbong siya sa kinauukulan.
Hanggang sa dumating ang trahedyang magiging mitsa ng kaniyang kamatayan.
Sa paggising niya sa ibang katauhan, nakilala niya si Duke Villamor. Ang gwapong doktor na tumulong sa kaniya at nag-aruga.
Maisakatuparan ba niya ang paghihiganti sa dating asawa?
Mabibigyan ba ng hustisya ang pagkamatay niya at pagiging sawi?