Bago naglako ng araw na iyon ay dumaan muna si Aarah kina Bart. Naglambing kasi ito na gusto raw siyang makita kahit sandali lang dahil nami-miss na siya. Kahit ang totoo ay sa bahay siya nito natulog kagabi at halos kauuwi lang niya kaninang umaga.
"Ako na lang ang bibili ng lahat ng biko mo. Para hindi ka na aalis sa tabi ko," paglalambing sa kaniya ni Bart nang puntahan niya ito sa kuwarto. "Nami-miss na kitang kakuwentuhan, eh."
"Huwag na. Masasayang lang ang pera mo." Nakangiti siyang umupo sa upuan na nasa gilid ng kama nito. "Hindi naman namin kayang ubusin nina Nenette ang isang bilao, eh. Matatambak lang sa pridyider."
"Iuwi mo sa mga kapatid mo. O kaya'y ipamigay mo diyan sa labas," giit ni Bart. "Gusto ko kasi na dito ka lang sa tabi ko. Marami akong ikukuwento sa'yo."
Makik
