"Nanang, bakit ho kaya hanggang ngayon ay hindi pa rin bumabalik si Grey? Okay lang kaya siya?"
Hindi maitago ni Aarah ang matinding pag-aalala sa kaibigan habang kausap ang matandang babae. Tatlong araw na rin simula nang umalis si Grey. Wala pa ring tigil sa pagbuhos ang malakas na ulan. Sinundan kasi ng supertyphoon ang low pressure area kaya tuloy-tuloy lang ang pag-ulan. At nag-aalala na si Aarah para kay Grey.
"Totoong sanay na kami sa pabigla-bigla na pag-alis at matagal na pagbalik ni Sir Grey. Pero aminado ako na iba ang pakiramdam ko ngayon, hija," tugon ni Nanang Imelda na alalang-alala rin ang boses. "Inutusan ko nga si Jose na pumunta ng La Trinidad, eh, para alamin kung naroon ba siya. Putol kasi ang linya ng telepono natin dito dahil kasama sa tinamaan ng landslides ang is
