Kabanata 79 – Part III
Nakatitig lang ako sa kisame ng kwarto ko. Alas tres pa lang nang madaling araw pero gising na gising na ang diwa ko. Ni hindi ko alam kung nakatulog ba talaga ako, dahil tingin ko’y ilang minuto lang ang pagpikit ng aking mga mata. Buhay na buhay at napakaingay ng utak ko dahil sa dami ng mga tumatakbong katanungan sa isipan ko.
Huminga ako nang malalim bago kinuha ang cellphone ko at agad na nagbukas ng internet para maghanap ng mga posibleng kasagutan sa mga katanungan ko.
May ideya na ako sa posibleng rason sa mga nararamdaman ko nitong mga nagdaang araw, pero gusto ko pa ring makasigurado. Hindi ko nga muna sinabi kay Alas dahil baka umasa siya. Hindi ko rin masabi kay Ma’am Antonette dahil paniguradong ganoon din ang iisipin niya. Hangga’t maaari ay gusto ko
