BLESSY
“DADDY, tabi po uli tayo sa pagtulog mamayang gabi, ha?”
Mula sa pagmamasid sa labas ng kotse ay napalingon ako kay Clay na katabi ko nang sabihin niya iyon sa kaniyang ama na nasa kabilang side naman niya. Lulan kami ng kotse para magsimba. Tulog na na tulog naman siya nang magtabi kami ng kaniyang ama kagabi. Naramdaman lang niya siguro.
Napansin ko na kumunot ang noo ni Dux. Gumuhit ang pagtataka sa kaniyang mukha nang balingan niya ang aming anak. “What do you mean?”
“Tabi daw kayo uli sa bed mamayang gabi. Naramdaman ka niya siguro kagabi,” sa halip ay paliwanag ko sa aking asawa para kay Clay.
“What?” Tila along naguluhan ang mukha ni Dux. Kahit ako ay nagtataka na rin sa naging reaksiyon niya. Na para bang imposible ang narinig niya.
“Dad, please?” pangungulit ni Clay.
