DUX
“DADDY, kumusta po si Catriona? Okay lang po ba siya? Sinabi po kasi ng mga classmate ko kanina na nadulas daw po siya at muntik nang mahulog sa hagdan,” nag-aalalang tanong ni Clay habang pauwi na kami galing school. Katabi ko siya rito sa front seat. “Gusto ko po sana siyang puntahan kanina. Akala ko po kasi may umaway sa kaniya, eh. Pero ang sabi po ni teacher, huwag na daw po kasi papunta na rin po kayo, eh.”
Napangiti ako sa tono ng pananalita ng aking panganay. Nakakatuwa talaga ang pagiging protective niya sa kapatid.
“Huwag ka nang mag-alala, anak. Dahil okay lang ang kapatid mo.” Nangingiting inabot ko ang kaniyang buhok at bahagyang ginulo. “Pero thank you dahil nag-try ka pa rin na protektahan ang kapatid mo. Ganiyan dapat ang kuya, ha? Ipinagtatanggol at pinoprotektahan
