Katahimikan ang bumabalot sa loob ng bahay miski sa kusina kung saan kami kumakaing tatlo ng tanghalian. Wala sa dalawa kong kasama ang nagkikibo. Si Viro ay sadyang ganito naman talaga habang si Carina ay tulala. Siguro ay hindi pa rin siya nakakahuma sa naging balita.
Kung titignan silang dalawa, para bang kumakain lang sila dahil kailangan kung kaya naman miski ako ay nakakaramdam ng kawalan ng gana. Hindi ko na rin maubos ang kanin na inilagay ko sa plato. Sa bandang huli ay hindi na ako nag-abala pa na pilitin ang sarili at binitawan ang kutsara at tinidor. Sabay silang dalawa na nagbaling ng tingin sa akin at bumagsak iyon sa pagkain kong natira. Mabuti na lamang at bago pa sila makapagtanong ay tumunog ang cellphone ko na naka-charge sa sala. Tumayo ako at nagtungo roon.
H
