Araw ng Martes, maagang nagising si Maverick upang isabay muli si Lilith. Hindi niya alam kung anong nangyari sa scooter dahil hindi na niya nagawang itanong kagabi. Umakyat na kasi siya sa silid at nahiga dahil parang pagod na pagod ang katawan niya. Pakiramdam niya'y nasa ibabaw pa rin siya ng tubig, lumulutang at lumalangoy.
Maaga siyang nakatulog, nagising nang bandang alas dos na nang madaling araw at muling bumalik sa pagtulog. Nagising siya pasado ala singko at sakto lamang upang makapaligo pa siya.
Pakiramdam niya'y fully charge siya ngayon. Nakatulong ang pagtulog niya nang maaga kagabi. May isa pa siyang napansin sa sarili, ang hindi mabura sa kaniyang mukha na ngiti.
Matapos mapatuyo ang buhok gamit ang tuwalya at saka siya nagbihis. Sinuklay nang maayos ang kaniyang buhok.
