Nagulat si Jether nang masilayang muli si Chad kaya nalito siya kung ano ang kanyang gagawin. Basta, pagkatapos niyang ibinigay ang kanyang panyo sa lalaki ay kaagad na siyang umalis. Humingi siya ng dispensa kay Pasha na bumalik na muna sa loob.
“Jet, pakitulungan ang ama mo na dalhin ang mga pagkain sa tent.” Utos ni Juliet.
“Cr muna ako, Ma.” Nagsinungaling siya.
“O sige, basta sumunod ka na doon kaagad ha.” Bilin ni Juliet.
“Opo, Ma.” Nagsinungaling siya kasi wala na siyang balak na bumalik pa.
Habang nasa kanyang silid, pasimple niyang inadjust ang kurtina sa bintana upang matanaw ang kaganapan sa baba. Kaya lang, biglang tumingala si Chad at kinabahan siya. Nakita kaya siya nitong nakasilip sa may bintana?
