MATALIM ang tinging ipinukol niya sa babae habang magkasalubong ang mga kilay nitong nakatitig sa kanila ni Malina.
"Cielo?" tila nagtatakang tanong ng dalagang nakayakap pa rin sa kaniya.
Tinapunan siya ng tingin ng dating asawa at nakita niya kung paano siya nito inirapan. Lumapit ito kay Malina at malakas na hinila sa braso ang babae palayo sa kaniya.
"Cielo, bakit ba? Ano'ng ginagawa mo?" bakas ang pagtataka sa boses ng dalaga. Maging sa mukha nito ay may bahid ng kalituhan.
Masama pa rin ang tingin nang balingan ito ni Cielo. "Ikaw! Ano'ng ginagawa n'yo!" pagalit nitong tanong na ikinatigil ni Malina.
Bahagya siyang napangiti. "Hindi mo ba nakita? Nagyayakapan."
Nakuha niya ang atensiyon ng dalawa. Mas lalong tumalim ang mga mata ni Cielo dahil sa sinabi niya. Tila ba handa na i
