Nangunot ang noo ni Selena nang pumasok si Dina sa kusina na nakabusangot ang mukha.
"O ano'ng nangyari, bakit nakasimangot ka?" tanong niya rito, kasalukuyan niyang inihahanda ang meryenda ng kaniyang alaga. Nagluto ng baked mac si Olga at iyon ang dadalhin niya sa silid ni Liam, sinamahan niya ng garlic bread at orange juice.
"Dumating na naman kasi ang bruha, kung makautos dinaig pa ang amo," himutok nito.
"Huh! Sino ba ang tinutukoy mo?" naguguluhang tanong niya.
"Si Ma'am Charlene, sino pa ba? Akalain mo, inutusan ako na gawan siya ng mango shake at ang gusto ay 'yung fresh mango talaga. Saan naman kaya ako kukuha, hindi pa naman tag-mangga ngayon?"
Nasamid sa sarili niyang laway si Selena. Gusto sana niyang matawa sa sinabi ni Dina kaya lang ay nabarahan na ang lalamunan niya.
