“SIGURADO ka na ba talaga sa desisyon mo, girl?” tanong ni Pony nang akyatin siya nito sa kaniyang silid. Kanina niya lang ito tinawagan para hingan ng moral support. Sa gabing iyon kasi nakatakdang mamanhikan si Cayel. Aminin man niya o hindi, kanina pa siya balisa at hindi mapakali. Sari-sari ang nararamdaman niyang kaba at pag-aalala kaya kailangan niya ang presensiya ng mga taong mahalaga sa kaniya.
“Nakasagot na’ko kay Cayel. Para naman akong hindi taong kausap kung babawiin ko ‘yun.”
“Oo naman. Nandun na nga tayo. Pero naisip mo na ba kung paano na lang kapag may nakilala ka?”
Kumunot ang noo niya. “Nakilala na ano?”
“Nakilala na ibang lalake na gusto mo at gusto ka? Paano kung ma-inlove ka sa iba, pero kasal ka na naman kay Cayel?”
Nagbuntung-hininga si Darrina. “Naisip ko na
