"Lola!"
"Ronalie! Apo ko!"
Magiliw na sinalubong ni Lola Agnes ang tatlong magkakaibigan nang makadating sila sa lumang bahay ng matanda.
Nagyakap ang mag-lola. Mahigpit. At halatang miss na miss ni Lola Agnes si Ronalie. Ito kasi ang nag-alaga sa dalaga mula noong natagpuang wala nang buhay sina Aling Vergie at Erlie noon.
"Ang laki-laki mo na, Ronalie! Parang kailan lang no'ng binibilhan pa lang kita ng gatas! Ngayon dalaga ka na! Ang ganda-gandang dalaga!" wika ni Lola Agnes na ngiting-ngiti. Pinapasadahan nito ng tingin ang kabuoan ng apo. "Sayang at 'di ka na nakita nina Vergie at Erlie. Siguro ay masayang-masaya sila ngayon kung nabubuhay pa sila kasi lumaki ka na maayos."
Nahihiya na napatingin si Ronalie kina Jeff at Baklang Benjie. Nagdradrama na kasi ang kanyang lola.
