NAKATITIG lang si Sam sa family portrait nila, sa may malawak na salas ng kanilang mansiyon.
Kalalabas lang niya sa ospital. At pagpasok nga sa mansiyon ay ang malaking portrait agad na iyon ang nakaagaw sa kaniyang atensiyon.
Bigla ay para bang piniga ang puso niya habang nakatitig doon. Ang mga luha sa kaniyang mga mata ay dagling namuo.
Paanong siya na ang nasa pamilyang iyon? Ano ang nangyari? Nasaan na ang nakilala niyang Samarrah Ladjasali simula pagkabata niya? Nasaan na ang kaniyang kinilalang ina na si Nanay Agatha? At ang ina ni Azriel na si Shantal, bakit kay tagal na rin niyang hindi nakikita? Wala siyang balita rito o kahit marinig na pinag-usapan ito ng mga tao sa paligid niya.
Ano ang totoong nangyari at naroon siya ngayon sa pamilyang iyon? Hindi niya ngayon maunawaan.
