FAYE
Nagising ako nang bumukas ang pintuan. Ngayon lang umuwi si Sir Adi, pero wala akong balak na kausapin siya at magtanong kung saan siya galing. Ang alam ko, may ginawa siyang trabaho. Hindi rin ako naghintay sa kaniyang umuwi kagabi dahil hindi ako sigurado kung kailan siya darating.
Naramdaman kong lumapit siya dito sa kama. Hindi ako nagmulat kahit lumapat ang kaniyang labi sa aking noo at hinalik-halikan ako. Hinaplos pa niya ang aking pisngi at magaan na hinalikan sa labi.
Nagkunwari akong natutulog dahil ayaw ko siyang kausapin. Nanatili akong nakapikit at hinintay siyang umalis sa tabi ko dahil hanggang ngayon, hindi ko alam kung paano siya haharapin at kakausapin.
Bigla na lang siyang umalis kahapon at hindi na umuwi, tapos tanghali na siya bumalik ngayon. Naisip ko tuloy n
