"Ang gara nitong couch nila. Kayang-kasya ang katawang lupa ko rito. Puwede pa akong gumulong sa lagay na 'yan."
Tawang-tawa si Samantha sa reaksiyon ni Jigsaw nang makita ang sofa na pangdalawahan lang nang makapasok sila sa loob ng kuwarto. Sa laki at tangkad nito, siguradong laylay ang mga paa at balikat nito. Halos sumakit na ang tiyan niya sa katatawa. Unti-unting napatigil lang siya nang mapansing titig na titig sa kaniya ang lalaki. Puno ng amusement ang mga mata nito.
"Huwag ka naman masiyadong tumatawa. Lalo kang gumaganda, eh," wika nito bago ngumiti.
At hayun na naman ang puso niyang bigla na namang naghurumentado. Guwapo rin naman si Teddy, lalo na kapag ngumingiti. Pero itong lalaking kaharap niya ngayon ay hindi hamak na mas guwapo. In fact, ito na yata ang pinakaguwapon
