"Ikaw ba iyan, Kuya? Susme, hindi ka nagpatinag noong si Grace ang nawala at inakala nating patay na. Hindi rin kita nakitang tumikim ng alak sa pitong taong pagkakawalay niya sa atin. Tapos ngayong mas kailangan ka ng mga anak mo ay saka ka pa nagkakaganyan?" Hindi maipinta ang mukha ni Yana habang nakapamaywang sa harapan ng Kuya MJ niya.
"Hon, kaya nga pumarito si bayaw upang matulungan natin siya. Hindi iyong sinesermunan mo pa," tuloy ay paninita ni Terrence.
"Hindi ka pa nasanay sa asawa mo, bayaw. Kahit noong bago kayo humarap sa altar ay ganyan na siya magsalita sa akin. Kung inaakala mong galit ako ay hindi. Dahil totoo naman ang sinasabi niya. Wala akong gustong kampihan sa kanilang tatlo. Dahil mahalaga silang lahat sa akin. At kilala n'yo ang bawat isa sa kanila. Si AJ tahimi
