“ANONG kadramahan ito, Shemalyn? Bakit sabi ni Nena ay ayaw mo raw kumain.” As I expected ay tinig ni Yaya Anette. Kinuntsaba ko kasi si Nena kanina nang tinawag niya ako para kumain. Sinabi ko na sabihin niya kay Yaya na ayaw ko kumain kunwari para si Yaya ang pupunta rito sa kuwarto ko. Alam ko na hindi ako matitiis ni Yaya ko, lalo na’t istrikto siya pagdating sa tamang oras ng pagkain. Same sila ni Papa. Walang diet-diet na word dito sa bahay.
Dumating na sila kanina ni Papa. Nakita ko mula sa bintana ng room ko ang pagdating ng kotse ni Papa. At grabe ang kaba ko kanina kasi napansin ko na masama ang timpla ng mukha ni Papa. Napatingala pa siya sa kuwarto ko. Nakatago lang kasi ako agad sa kurtina kaya malamang ay hindi niya niya ako nakita.
Talaga yatang nagsumbong si Yaya Anette.
