JAMILLA
Kanina pa ako kinakabahan habang nagbibihis ng hospital gown dahil sa gagawing ultrasound sa tiyan ko.
Kahit kasama ko si Drake, hindi nawawala ang kabang nararamdaman ko dahil nagkaroon na ako ng phobia na humarap sa doktor dahil malaki ang naging epekto sa emosyon ko ng paulit-ulit na test results na natanggap ko mula sa mga doktor na sumuri sa akin sa Australia.
Natatakot na talaga akong magpatingin sa doktor, at alam ni Drake ang tungkol dito dahil paulit-ulit kong sinabi sa kaniya na ayaw ko sanang gawin ang ultrasound. Natatakot talaga ako, pero alang-alang sa batang nasa sinapupunan ko, pilit kong nilalabanan ang takot at kabang nararamdaman ko.
“Baby, nandito lang ako,” pabulong na sabi sa akin ni Drake.
Mahigpit kong hawak ang kamay niya habang nakahiga ako sa kama.
