Kabanata 65:
“Iisa ba ang kwartong tinulugan n’yo?” Iyon kaagad ang unang tanong ni Johnson pagkapasok nila sa palasyo.
Bahagyang napapalatak ng tawa si Archer bago siya nilingon. “May respeto ako kay Prinsesa Brenda.”
Kahit na sinabi na iyon ni Archer kay Johnson, hindi pa rin talaga siya kumbensido. Alam niya kasing may gusto si Archer kay Brenda kaya iniisip niyang may iba pang nangyari bukod sa sinabi nito. Sino nga bang magtitiwala sa isang karibal?
Pabalik na sana siya sa kanyang kwarto nang may bigla na lamang kumapit sa kanyang braso. Sa gulat niya’y kamuntikan pa siyang mapamura. Agad niya iyong nilingon at nakita si Prinsesa Gladiola na namumungay ang mga mata, tila ba’y galing sa pag-iyak.
“Nabalitaan ko ang nangyari, isang Linggo ka raw na hindi nagising. Kumusta ka na?”
