Wala na kong nagawa nang hilahin ni Skye ang Daddy niya paakyat sa second floor, sa mga kuwarto namin. Pinagkasya ko na lang ang sarili kong manood ng palabas sa tv.
Nang may sampung minuto na ang nakalipas ay sumunod na ko sa kanila sa taas. Naabutan kong nakahiga na si Skye sa kama niya habang si Cloud ay nakaupo sa gilid nito. Sabay pa silang napalingon sa akin pagkabukas ko ng pintuan.
"Mom, ang kulit ni Daddy..." sumbong pa ni Skye.
Lumapit ako sa kama. Lumuhod ako sa tapat ni Skye.
"Matulog ka na. Bukas na lang uli kayo magbonding ni Daddy."
"Kasi si Daddy ang kulit. Dito daw siya matutulog sa tabi ko."
"Oh. Ayaw mo ba?" tanong ko dito.
"Dapat dun siya sa tabi mo matulog para bukas may baby sister na ko."
