Four Months Later…
ABALA sa pagbabasa ng libro si Maryey sa isang bench, sa may Japanese Garden ng UHB Leisure Club, nang may tumabi sa kanya sa kinauupuang bench. Hindi niya iyon pinansin sa pag-aakala na baka nakikiupo lang iyon doon.
“Busy na busy ang buntis?”
Saka lang nagawang mag-angat ng tingin si Maryey. Napangiti siya nang makita si Zafrina. Isa ito sa naging malapit sa kanya sa lugar na iyon. Magkatabi rin ang pinapagawa nilang bahay ni Sergio sa Phase III ng Valle Encantado Village sa bahay nina Zafrina Millares.
“Hi, Zaf,” bati pa niya rito. “Nagpapalipas lang ng oras.” Isinara niya ang libro at ipinatong iyon sa kanyang hita. Tiningnan niya ang paligid. “Hindi mo yata kasama si Rain at Zafire?” tukoy niya sa dalawa nitong anak.
“Nasa daddy nila.” Mataman siya nitong pinag
