KARIM
INIHATID ko si Victoria sa tapat ng gate ng village kung saan sila naninirahan. Hindi maalis-alis sa aking labi ang ngiting dulot ng mga ginawa namin kanina. Iyon ang pangalawang beses na nasaksihan ko ang paglubog ng araw mula sa isang burol. Ang unang beses kasi ay noong bata pa ako. Kasama ko noon si Kuya Rogel.
Nang tuluyan nang maglaho sa aking paningin si Victoria ay pinaandar ko na ang aking motor. Pero natigilan ako nang may humarang sa aking isang pulang mamahaling sasakyan. Maya-maya pa ay bumukas ito at iniluwa ang kaibigan ni Victoria na hindi ko pa alam ang pangalan.
"What are you doing here?" Matalim niya akong pinagmasdan mula ulo hanggang paa. "Did I tell you to stay away from her?"
Sadya kong pinakunot ang noo ko. "Her? Sino ba ang tinutukoy mo?" pagkukunwari ko.
