“GOOD MORNING, Mommy Anne!”
Nagising si Anne sa matinis na boses na iyon, kasabay ng pagbukas ng lahat ng ilaw sa silid niya. Agad siyang napapikit nang masilaw siya. Ayaw na ayaw pa naman niyang bigla-bigla na lang bubuksan ang ilaw pagkamulat pa lang niya. At kung siya pa iyong dating Anne, malamang ay kanina pa siya nagwawala sa galit o pagkainis. Baka namura na niya ang sino mang gumawa niyon.
Ngunit paano nga ba niya mamumura ang gumawa niyon kung kasing cute iyon ng batang agad na humiga sa tabi niya at yumapos sa baywang niya ang maliit na braso. Motion light control kasi lahat ng ilaw sa silid niya kaya nabuhay ang mga iyon kahit kasing liit ng batang ito lang ang pumasok.
Pero dahil malaki na ang ipinagbago ni Anne simula nang maging sila ni Crisostomo, sa halip ay napangiti pa
