NAGTATAKA si Martina bakit hindi sumasabay sa kanya sa paglalakad si Devey. Mamaya ay huminto siya at hinarap ang lalaki. Huminto rin ito.
"Bakit?" takang tanong nito.
"Bakit ayaw mo akong sabayan sa paglalakad? Hindi ako sanay na may nakabuntot sa akin," aniya.
Ngumiti ito. "Kapag sinabayan kita, hindi maiiwasang maghinang ang mga balikat at kamay natin," anito.
Tumawa siya ng pagak. Tuluyan nang naglaho ang takot niya. "Ano naman ang masama kung maghinang ang mga balikat natin?" pagkuwa'y tanong niya.
"Nakakadama kasi ako ng nakahihibang na vibration sa tuwing nasasagi ko ang balat mo," anito. Nanilay ang matamis na ngiti mula sa labi nito.
Bumungisngis siya. "Grabe, ang weird mo talaga. Pero ang sarap mong kasama," aniya.
"Masarap ka ring kasama, Martina."
Sandali siyang natigil
