… KAI’s POV …
“Umuwi na si Aman. Babalik na lang daw siya mamayang hapon. May aayusin lang siya sa opisina raw saglit,” imporma sa akin ni Nanay Rose nang pumasok siya sa kuwarto ko. May dala siyang tray ng pagkain, ang almusal ko.
Hindi ako umimik. Nanatiling nakaupo lang ako sa ibabaw ng kama ko. Malungkot. Nag-iisip kasi ako nang malalim habang yakap-yakap ang dalawang tuhod ko. Iniisip ko ang sinabi ko kay Aman kanina na gusto kong labanan sina Juke at Sophia. Hindi ko alam kung paano mag-uumpisa.
“Ayos ka lang ba?” tanong sa akin ni Nanay Rose nang naibaba niya ang tray sa side table ng kama ko. “Mag-almusal ka muna. Paborito mong hotdog at bacon ito.”
Isinubsob ko ang mukha ko sa mga tuhod ko para ipakita sa kanyang wala akong gana ngayon na kumain at lalo na ang makipag-usap.
