“ANO ba naman 'tong cellphone na ibinigay ni Ate Hyacinth mo, ang bilis ma-lowbatt,” reklamo ni Chrysantha nang maputol ang linya habang kausap si Timo. “Maira, may pantawag ka ba?”
“Lowbatt nga rin ako. Parehas tayo ng pinagbilan, si Hyacinth din, hindi ko pa mahanap 'yong charger,” kunot-noong sagot naman nito. “Mauna na kayo pumunta sa Quiapo, i-cha-charge ko muna 'tong mga cellphone natin.”
“Sige. Tara na, Teyo, siguro naman narinig ni papa mo 'yong mga sinabi ko,” aya niya sa anak.
Linggo ngayon kaya siguradong madaming tao sa Quiapo, at sigurado ring nakakalat doon ang lahat ng kaibigan niyang Mga Bulaklak Ng Quiapo. Dalawang linggo na ang mabilis na lumipas nang masabi niya sa anak na si Timo ang ama nito—na labis naman nitong ikinatuwa. Agad nitong ipinagmalaki sa mga kalaro
