HINDI alam ni Erin kung gaano na sila katagal sa ospital simula nang dalhin sila roon ng mga sundalo na nagligtas sa kanila sa Mount Dalahikan para iligtas ang buhay ni Caleb. Dahil may maselang parte ng katawan nito ang tinamaan ng bala at nangangailangan ng agarang paggamot kaya sa helicopter ng mga sundalo na lang sila isinakay para mabilis silang makarating. Habang naiwan naman sa bundok sina Bernie at Ate Susan pero parehong ligtas na dahil nasa kamay na ng mga sundalo.
Tinawagan na ni Erin ang pamilya niya at pamilya ni Caleb para ipaalam ang kinaroroonan nila at ang kalagayan ng binata. Bagaman at hindi na muna sinabi ng dalaga sa pamilya ni Caleb ang sinabi ng doktor na critical daw ang kalagayan nito. Kasalukuyan itong nasa operating room at sinusubukang iligtas ng mga doktor.
