Magkahawak-kamay na tinungo nina A at Aarah ang nakikita nilang falls mula sa hindi kalayuan, na sinadya pa nilang dayuhin dito sa Laguna para magbakasyon. Isa iyong pribadong lugar na nirentahan ng binata para dalhin doon si Aarah. May sorpresa kasi siya para rito.
"Ang sarap naman pakinggan ng lagaslas ng tubig," narinig ni A na sabi ng kasintahan. "Sa tanda kong ito ay ngayon lang ako nakaapak sa ganitong lugar. At tama nga pala talaga ang sabi ng iba. Nakakarelaks."
"At para mas masarapan ka, kakargahin pa kita." Walang ano-ano na pinangko ni A ang nobya. Tumawa lang siya nang muntik na itong mapasigaw.
"Ibaba mo nga ako," kunwari ay reklamo ni Aarah. "Baka sabihin pa ng mga makakita sa'tin dito na nagpupulot-gata tayo. Ni hindi pa nga tayo ikinasal."
"Solo natin itong lugar, 'Ling
