Nagulat kaunti si JL nang napagbuksan niya ng pinto ang isang ginang. Isang ginang na sosyalin ang dating at kahit hindi na niya tanungin kung sino ito ay alam na niyang ito ang mommy ni Jonathan.
“Magandang araw po,” kiming bati niya na may kasama pang bahagyang pagyuko ng ulo bilang paggalang.
Subalit sa kabila nang ginawa niya’y tinaasan siya ng isang kilay ni Aling Susan. Tiningnan din siya nang pababa’t pataas.
“Hanap niyo po ba si Jonathan? Nasa taas po siya. Tatawagin ko po para—” Hindi niya naituloy ang sinasabi dahil walang sali-salitang sinampal na lang siya ng ginang.
“Malandi ka!” tapos a singhal nito sa kanya.
Nagsalubong ang dalawang kilay ni JL na napasapo sa pisngi niyang agad namula. Tiningnan niya na rin nang masama ang ginang. Nawala agad ang respeto niya rito.
