BUMUKAS ang pinto ng silid at iniluwa niyon si Betla. Larawan ng awa ang mukha nito nang pasadahan ng tingin si Carmina habang nakahiga ang babae sa ibabaw ng kama.
"Anak, kakain na. Nakahanda na sa mesa ang mga pagkain." Sumilay ang pilit na ngiti sa mga labi nito.
Umanod naman ang isang luha sa kanang pisngi niya. Hindi niya pinansin ang mga sinabi nito at nanatili lamang na walang imik.
Nagbuga ng malalim na hangin ang matandang bakla. Lumapit ito sa kamang kinahihigaan niya at umupo sa gilid ng kama. Nakaharap ito sa mesa at ladderback chair na malapit sa pinto ng silid. Bakas ang lungkot sa mukha ng matanda.
"Isang buwan na ang nakalilipas simula nang iwan tayo ni Baby JR. Isang buwan na rin simula nang bayaan mo uli ang sarili mo." Huminto ito sa pagsasalita at tinitigan siya. "I
