MATAPOS nilang pagsaluhan ang ilang minutong pagdadampi ng mga labi, hinila siya ni Linus palapit sa kotse nito at sapilitang pinapasok sa loob. Hindi naman niya nagawang makapagsalita. Umayon na lamang siya sa gusto ng lalaki.
Napukol naman sa kanila ang atensiyon ng mga taong naroroon. May ilan sa mga ito na masayang pumalakpak, may malalaking ngiti sa mga labi, habang iilan naman ang kumukuha sa kanila ng bidyo.
Mabilis na pinaharurot palayo ni Linus ang kotse nito. Habang lulan sila ng tumatakbong sasakyan ng lalaki at nasa kalagitnaan ng biyahe, ni isang segundo ay hindi binitiwan nito ang kamay niya. Hindi na rin siya nagmatigas. Tutal, kahit anong galit ang ipakita niya, hindi na niya maitatanggi ang katotohanang may nararamdaman na siya para sa asawa. Lalo niyang napagtanto iyon
