Bahagya siyang natawa nang tuluyan siyang talikuran ng matanda at nagpatiuna na sa dining room. Sumunod naman sa likuran nito ang apo nitong si Señorita Ciara.
"Sigurado ka ba sa gagawin mo, Linus?" narinig niyang bulong ni Elton nang makalapit ito sa kaniya.
Muli siyang ngumiti habang hinahatid ng tingin ang papalayong dalaga. Nagbuga siya nang malalim na hangin at bahagyang tumango.
Nang makuha ang kaniyang sagot, walang ibang nagawa si Elton kundi tumango rin at magpakawala ng hangin. Nagsimula na silang humakbang at pumasok sa dining room.
Sa pagpasok nila ay bumungad sa kanila ang mahabang mesang puno ng pagkain. Palihim siyang umiling bago tuluyang lumapit sa tabi ng don. Umupo siya sa tabi nitong nakaharap sa dalagang si Señorita Ciara. Nasa kaliwa siya ng don at ang babae naman
