TULUYANG pumasok sa nakabukas na pintuan si Carol at patakbong yumakap sa kaniya. Umiyak ito habang nanginginig ang katawan, marahil sa takot na nararamdaman.
Matagal niyang pinakiramdaman ito at hindi umimik. Maraming taon na ang pinagsamahan nila ng babae, subalit ngayon niya lang itong nakitang ganito katakot.
Kumalas siya mula sa yakap ng babae at mataman itong pinagmasdan sa mukha. "Ano'ng nangyari? Bakit may mga pasa ka sa mukha?"
Sa halip na sagutin ang tanong niya, hindi ito umimik at umiyak lang nang umiyak. Minabuti niyang paupuin ito at bigyan ng tubig upang pakalmahin.
Nakatayo siya sa harap nito, pinagkatitigan mabuti ang pasa sa mukha nito. "Sinaktan ka ba ng asawa mo?"
Muli ay hindi pa rin nagsalita ang babae, ngunit sa pagtahimik nito ay nakuha naman niya ang sagot na
