NATIGILAN si Tricia nang marinig ang sinabi ni Andriano. Mula sa guwapo nitong mukha, iginala niya ang paningin sa paligid nang muli silang magpatuloy sa paglalakad.
Ipakikilala nito ang tunay nitong ama? Pero bakit nasa sementeryo sila? Hindi kaya . . . patay na ang totoong ama nito?
Tumigil sila sa harap ng isang lapida. Hindi agad niya nakita ang pangalan ng nakasulat doon dahil sa pagyuko ni Andriano upang ilagay ang dalang bulaklak.
Narinig niya ang paghugot ng hangin ng lalaki na para bang may labis na nagpapabigat ng dibdib nito. Dahil doon ay nabaling kay Andriano ang buong atensiyon niya. Natigilan siya nang makitang namumula ang mga mata nito, nagbabantang bumagsak ang ilang butil ng luha.
"Buong buhay ko, kinamuhian ko siya. Isa siya sa mga sumira sa buhay namin, lalo na sa
