“PASENSIYA NA PO, Sir, tulog pa po kasi si Ma’am Tanya.”
“Ganoon ba?” ani Karzon sa kawaksing kausap nang tumawag siya sa bahay ng mga magulang ni Natanya kinaumagahan. “Pakisabi na lang ho na papasok na ako sa opisina.”
“Sige po. Makakarating po.”
Kahit paano, pakiramdam ni Karzon ay gumaan na ang kaniyang namimigat na pakiramdam simula kahapon. Siguro ay napuwersa lang siya sa trabaho nitong mga nakaraang araw. Kahit kasi nasa bahay na siya ay nag-o-overtime pa rin siya para hindi mahirapan si Mister Rosales sa mga dapat nitong gawin habang wala siya sa bansa.
Kaya naman kahapon ay hindi na siya nakatawag pa sa kaniyang asawa dahil agad siyang iginupo ng antok pagkauwi niya. Hindi na rin siya nakakain pa ng hapunan kaya kanina siya bumawi ng kain sa almusal.
Mamaya na lang siya tata
