Kinabukasan, paggising ni Anamor ay mag-isa na lang siya sa ibabaw ng kama. Medyo tanghali na rin kaya hindi na siya nagtaka kung bakit wala na si Marco sa tabi niya. Wala na rin sa kuwarto ang kanilang anak na madalas ay kinukuha ng kanyang ama tuwing umaga para ipasyal at paarawan. Ganoon lagi ang ginagawa nito bago pumunta sa trabaho.
Bumangon si Anamor sa kama at kaagad na dumiretso sa banyo. Nagtagal siya ng halos kalahating oras sa loob at paglabas niya ay nasa loob na ng kanyang kuwarto si Marco na kasalukuyang inaayos ang ibabaw ng magulo niyang kama. Nakuha niya ang atensyon ng binata na agad na lumapit sa kanyang puwesto habang may nakapaskil na matamis na ngiti.
"Good morning, mi amor..." malawak ang ngiting bati ni Marco bago siya pinatakan ng isang mabilis na halik sa labi.
